Inatsit tunngaviusoq

Ataani isumaginninnermut ikiorsiissutit assigiinngitsut saqqummersitami sammineqartut ikiorserneqarsiinnaanermut aammalu inatsimmut tunngaviit atuarneqarsinnaapput. Annertunerusumik paasisaqarnerorusuttut Ilaqutariinnermut, Naligiissitaanermut Isumaginninnermullu Naalakkersuisoqarfiup nittartagaani http://naalakkersuisut.gl– imi isumaginninnermut inatsisinik atuuttunik nalunaarutinillu atuartoqarlunilu aallertoqarsinnaavoq.

 

Pisortanit ikiorsiissutit

Isumaginninnermut ikiorsiissutinik pilersuinermut, aningaasartuutinut aalajangersimasunut allanillu ikiorserneqarsinnaatitaanermi piumasaqaataavoq qinnuteqartoq Kalaallit  Nunaanni inuit allattorsimaffianni najugaqartutut allassimanissaa, aammalu:

 

·       Qallunaatut innuttaassuseqarnissaa

·       Qalunaatut innuttaassusilimmut katissimanissaa, kateqqasimasuunissaa imaluunniit

·       Nunat tamalaat akornanni kattuffinni isumaqatigiissutit malillugit inunnut qallunaatut inuttaassuseqanngitsunut pisortanilli ikiorsiissutinik pilersuinermut aningaasartuutinullu aalajangersimasunut Kalaallit Nunaanniinnerminni ikiorserneqarsinnaatitaanissaa

 

Pisortanit ikiorserneqarsinnaaneq pisartoq taamaallaat ikiorsiissutit allat pisariaqartitaanut naammanngippata. Pisortaniilli ikiorsiisarneq pisarpoq Inatsisartut Peqqussutaat nr. 15 20. novembari 2006-imeersoq pisortanit ikiorsiisarneq pillugu, kingornalu 1. apriili 2009-mi allannguuteqarluni atuutilersoq malillugu.

 

Suliffeqanngikkallarnermi ikiorsiissutit

Suliffeqanngikkallarnermi ikiorsiisarneq pisarpoq suliffissaaleqinermi, napparsimanermi ajutoornermiluunniit isertitaqarunnaarsimanermi.

 

Suliffeqanngikkallarnermi ikiorsiissutit siunertaraat angerlartitaasimasutut allattorsimasut, suliffeqanngitsut sulisinnaatitaasut aammalu napparsimasut nammineq pisuussutiginngisamik suliffeqannginnermi, angerlartitaanermi napparsimanermilu isertitaqarunnaarsimasut aningaasaqarnikkut ikiorserneqarsinnaanissaat.

 

Ikiorsiinermilu pineqartup piumasaqaatit naammassisimasassai tassaapput:

 

·       18-inik ukioqalereersimanissaq imaluunniit pilersuisuuneq

·       Kalaallit Nunaanni inuit allattorsimaffianni allaqqasuunissaq aammalu

·       Sapaatip akunnerini 13-ini kingullerni suliffeqarluni aningaasarsiaqarsimanissaq, sulinermilu nalaani akunnerni 182- ini sulereersimanissaq. Suliffeqanngikkallarnermi ikiorsiissutit suliffeqarsimalluni isertitatut naatsorsuussaanngillat.

 

Suliffeqanngikkallarnermi ikiorsiissutit annertussusaat ullormi siullermi suliffeqanngitsutut saaffiginninnermit agguaqatigiissillugu akunnerit sapaatip akunnerini 13-ini kingullerni akissarsialittut suliffiusimasut malillugit naatsorsorneqartarput. Ikiorsiissutillu annerpaamik sapaatip akunnerini 13-ini pisartagarineqarsinnaapput. Ikiorsiissutaasartut minnerpaamik ulluni 14-ini annerpaamillu akunnerni 40-ini isertitanut naatsorsuussaapput.

 

Suliffeqanngikkallarnermi ikiorsiissutit akileraarusigassaapput, SIK-mi Naalakkersuisunilu isumaqatigiissutit malillugit akit minnerpaat ilinniagaqarsimanngitsunut 90 procentiinik naleqarlutik. 

 

Suliffeqanngikkallarnermi ikiorsiissutit Inatsisartut Peqqussutaat nr. 5 1. juuni 2006-imeersoq suliffeqanngikkallarnermi ikiorsiissutit pillugit 1. juuli 2006-imi atuutilersoq malillugu tunniunneqartarput.

 

Ernereernermi ullormusiat allallu

Ernereernermi ullormusiaqartitsineq pisarpoq ernisimalluni sulinngiffeqarmermi isertitaqarunnaarsimagaanni. Ullormusiaqarsinnaatitaaneq akissarsiaqarlutik sulisunut, namminersortunut taakkulu aapparisaannut pilersueqataasunut soorlu aalisartunut, piniartunut savaatilinnullu aammalu ilinniagaqarsimallutik naammasserlaanut ilinniarnissamullu ilinniarfinnut aaliangersimasunut qinnuteqarsimasunut atuuppoq. Ullormusiat annertussusaat ilinniagaqarsimanngitsunut akunnermut aki ilanngaatitaqanngitsoq malillugu annerpaamillu sapaatip akunneranut akunnernut 40-nut annertussusilinnut naleqqussagaavoq.

 

1. juuli 2006 aallarnerfigalungu ullormusialinnut atuutilertut tassaapput:

 

·       Naartusoq ernivissamut killigititaasumit sapaatip akunneri marluk sioqqullugit erninermi ernereernermilu sulinngiffeqarlersinaatitaasoq

·       Anaanaasoq sapaatip akunnerini 15-ini meeqqap inunngorneraniik sulinngiffeqarsinnaatitaanera aammalu aappassaanik amerlanernilluunniit meerartaaqqinnermi sapaatip akunnerini 19-ini sulinngiffeqarsinnaatitaanera

·       Ataataasup meerartaareernermit sapaatip akunnerini pingasuni sulinngiffeqarsinnaatitaanera

·       Angajoqqaajusut, ernereernermi sulinngiffeqareernerup kingorna nammineq aalajangikkamik sapaatip akunnerini 17-ini, imaluunniit ataatsimiit amarlanernik meerartaarnermi sapaatip akunnerini 21-ini (angajoqqaatut sulinngiffeqarnermik taasamik) sulinngiffeqqarsinnaatitaaneri

 

Ernereernermi ullormusiaqartitsineq pisarpoq Inatsisartut Inatsisaat nr. 14 17. decembari 2009-meersoq naartunermi, ernereernermilu sulinngiffeqarnermi meeravissiartaarnermilu sulinngiffeqarneq ullormusiaqarnerlu pillugit inatsit malillugu. Peqqussut 1. marsi 2010-mi atuutilerpoq, peqqussummilu nutaami sulinngiffeqarsinnaanerup sivisussusaa allannguuteqanngilaq.